Verneplanen for kulturminne i jernbanen

På grunn av det store omfanget oppgåva har, vil det ta tid å få utarbeidd ein komplett verneplan over alle jernbaneminna i landet. Jernbaneverket har derfor tilrådd overfor Riksantikvaren at NVP vert presentert gjennom fleire, tematiske delplanar som kan utarbeidast og gjevast ut over tid. Dette vil også gjere verneplanen lettare tilgjengeleg og betre eigna for bruk. Målet er at implementering i form av planvedtak, utarbeiding av vedlikehaldsplanar og økonomiske budsjett skal gå føre seg parallelt med at planen vert utarbeidd. Grunnlaget for Jernbaneverket sin verneplan vart sendt på høyring i 2004-05. Jernbaneverket har i perioden mai 2004 - oktober 2005 motteke rundt 100 merknader og innspel til høyringsdokumenta for "Nasjonal verneplan for kulturminner i jernbanen".

Førebels verneplan

Ein førebels verneplan i form av ei status- og tiltaksliste er utarbeida og skal gjelde inntil endeleg plan er godkjent av Riksantikvaren. Denne skal danne grunnlaget for Jernbaneverket sitt vidare arbeid med å ta vare på jernbanen sin kulturarv – i eigen verksemd og med oppfølging mot eksterne styresmakter. Lista er i kortform for enkel til å gjeve eit oversyn over kva for verna og verneverdige banar, miljø og bygningar som er under vurdering for å gå inn i "Nasjonal verneplan for kulturminner i jernbanen". Lista vil verte ajourført etter kvart som utgreiingar og prosessar som vert omtala, vert gjennomførte. Du vil alltid finne ei oppdatert liste i link til denne sida.

Utgjevingsprogram

Følgjande implementerings- og utgjevingsprogram er skissert for Riksantikvaren:

• Delplan 1: Tidens Fuldkomneste Kommunikationsmiddel – ei innføring i jernbanen sin infrastruktur og tekniske utvikling i eit historisk perspektiv.
• Delplan 2: På gamle spor og stiar - anleggsminne frå første generasjons baneanlegg.
• Delplan 3: Dampande samferdselshistorie – museumsbanane, komplette baneanlegg med museal drift.
• Delplan 4: Jernbanen sine stasjonar og stader – eksempel på arkitektur, parkkultur og stadsutvikling frå jernbanehistoria.
• Delplan 5: Jernbanen sine bruer – eit utval historiske jernbanebruer som skal bevarast.

Delplanane vil verte presenterte etter kvart som dei vert utarbeidde og ferdigstilte.

Prioriterte oppgåver i 2006 - 09

Prioriterte oppgåver i 2006 - 09 Oppgåva med å implementere delplan 3: "Dampande samferdselshistorie -museumsbanane", er gjeven prioritet i 2006 og 2007. Målet er at følgjande banar skal fredast og tilretteleggjast for museal bruk:

• Urskog – Hølandsbanen (er freda)
• Krøderbanen
• Setesdalsbanen
• Flekkefjordbanen
• Gamle Vossebanen
• Thamshavnbanen

Målet er at alle seks banane skal ha vedlikehaldsplanar på plass innan 2007-08, basert på forslaga om freding. Jernbaneverket hjelper til med desse planane, mens Riksantikvaren og fylkeskommunane tar hand om sjølve fredingsarbeidet.

I tillegg har Jernbaneverket bestemt at det skal utarbeidast tradisjonsbaserte forvaltningsplanar (også kalla "formingsrettleiarar") for:

• Kongsvingerbanen
• Gjøvikbanen
• Vossebanen
• Flåmsbana
• Raumabanen
• Ofotbanen

Arbeidet med desse rettleiarane er eit ledd i Jernbaneverket si vanlege forvalting av eigen kulturarv og skal danne ei kulturvernfagleg ramme for det fornyingsarbeidet som skal gjennomførast på den enkelte banen. Dette arbeidet har starta med Kongsvingerbanen og skal vidareførast i 2007, -08 og -09 med Gjøvikbanen og Raumabanen.

I 2007 vil det også verte oppstart på delplan 4: "Jernbanen sine stasjonar og stader". Prosjektet vil verte gjennomført i samarbeid mellom Jernbaneverket, NSB-selskapet ROM Eiendom AS, Riksantikvaren, Statens kulturhistoriske eiendommer og dei fylkeskommunane arbeidet vedkjem. Arbeidet skal ha fokus på jernbanestasjonane som miljø og del av verna strekning, der jamvel parkane skal få ei kulturvernfagleg evaluering. Arbeidet vil ta utgangspunkt i NSBs "Verneplan for jernbanebygninger" frå 1997 og skal vere Jernbaneverket si oppfølging av Kgl. res. "Overordna føresegner om forvaltning av statlege kulturhistoriske eigedomar".